Kur lufta në Ukrainë detyroi miliona njerëz të largohen nga shtëpitë e tyre, Rotarianët Pejanë kërkuan një mënyrë për të ndihmuar që do t’i arrinte refugjatët kudo që të ndodheshin.
Digital Clinic for Ukraine u ofron refugjatëve ukrainas qasje falas në kujdes shëndetësor online: konsultime me mjekë specialistë të njohur ukrainas, në gjuhën e tyre, nga kudo në botë. Në projekt janë angazhuar rreth 40 mjekë ukrainas.
Platforma u ndërtua në bashkëpunim ndërmjet Klinikës Digjitale, një kompanie kosovare e shëndetësisë digjitale e bashkëthemeluar nga anëtarë të Rotary Club Peja, dhe Universitetit Kombëtar të Mjekësisë në Ternopil në Ukrainë. Anëtari i klubit Dr. Dardan N. Albani e prezantoi projektin në klub në prill 2022, dhe që atëherë Rotary Club Peja e ka përkrahur vazhdimisht. Projekti është i listuar në Rotary Showcase të Rotary International.
Në janar 2023 klubi mirëpriti Oksana Tjupa, kryetare themeluese e Rotary Club Kyiv International, e cila prezantoi projektin e klubit të saj “Community Shelter Project” për strehimin e personave të zhvendosur brenda Ukrainës, dhe mundësitë për bashkëpunim të mëtejshëm.
